Nanako's Beauty Diary: 6月 2014

2014年6月30日星期一

深海石斑一味兩食: 清蒸 + 天麻魚頭湯 (附食譜)

大老爺同埋我都係魚癡，唔知之前係唔係休魚期，魚檔內找不到原條的大海魚，只有龍躉肉賣，已經有幾個星期冇原條大條海魚食了。

上星期六，相熟的魚檔再次迫滿人群，原來大海魚終於返黎了，我地買左條斤幾重既石斑，諗住清蒸。由於條魚較大，蒸15分鐘佢表面既肉會好滑，但係入面都會有少少黏骨，但蒸耐少少雖然冇黏骨，但係肉地冇咁滑 (有少少"鞋')，今次魚檔教我將條魚開邊，蒸12分鐘便可。

開邊這回事，真係要魚販代勞，我自己真的辦不到！

由於個隻鑊唔夠大，有勞魚販幫我砍甩埋個魚頭，我屋企把小學雞廚刀冇可能做到這個。

由於近來久不久又頭痛，打算煲個川芎白芷天麻魚頭湯，平時我係用大魚頭的，但係今次兩個人食咁大條魚，如果仲要食兩個魚頭，我怕太油膩，而家大魚頭要成$40-50一個，今次攪攪新意思，掟石斑頭落去煲天麻。

魚頭拍上生粉，加入薑片煎香。

呢個天麻石斑頭湯，味道比天魚頭的鮮美，也不乏驅除頭痛的功效。

食譜：

川芎白芷天麻魚頭湯 (4碗)

川芎少許

白芷少許

天麻少許

杞子 1湯匙

桂圓肉 1湯匙

大魚頭 (今次用石斑頭代替)

粟米 2件

紅蘿蔔 2件

金華火腿絲 2湯匙

螺片 1片

花膠 2隻

米酒 4湯匙

1) 藥材浸30分鐘，清洗乾淨

2) 把魚頭煎香

3) 把所有材料加入6碗水，於入煲內，大火煲30分鐘

4) 熄火後，放入真空煲2小時

5) 飲用前，大火再煲30分鐘即可

2014年6月27日星期五

牛記茶室: 點止茶室咁簡單

之前位於中環歌賦街的牛記茶室，被評為没有特色，而不獲業主續租被結業，現在於柴灣重新開張了。新舖地方寬敞，環境舒適，雖然位於柴灣，不像中環般方便，但不乏捧場客。

我看了電視台有關這間食店的節目，原來一間茶室修補了父親同囝囝的關係，而家佢地一家人一齊合作打理茶室，餐牌上的餸菜總類很多，有點心，還有很多連酒樓也吃不到的餸菜。我覺得佢唔止係一間茶室咁簡單，佢可以稱得上係一間酒樓。

玫瑰花皇太后雞：我見好多人都好點呢個餸，我起初也有點猶豫，因為我總覺得鼓油雞冇咩特別，連茶餐廳都可以食到，但係大老爺堅持要試，所以我地叫左半隻試下。

佢既賣相好靚，d雞皮係黏住d肉冇甩出黎的，佢既鼓油雞汁唔只係鼓汁味，而且甘香可口，而雞肉就肉質鮮嫩，雞皮真係不吃不可，平時出面食雞皮，一係就又肥又膩，一係就又乾又韌，但係呢個玫瑰花皇太后雞既雞皮，雖然有看得見的脂肪，但咬落去爽口而不膩，而且還很入味。這個雞是我繼泉章居霸王雞之後大讚的雞，下次要試下牛記怡香太子雞。

薑蔥魚雲煲：我很少吃食魚雲煲的，平時係酒樓叫魚雲煲都係比大老爺食，因為我怕多骨，又怕比魚骨刺傷口腔生飛滋。我今次破例試左呢個，食左第一塊之後就停唔到口，原來魚雲煲係可以咁好食既。

呢個餸一d都唔腥，興薑蔥配料等配搭比例洽到好處，而魚雲則甘香嫩滑，在這個煲內，我没有食過一舊’鞋’既魚，不得不給他一個讚。

腐竹薏米糖水：食飽飽諗住埋單，原來有糖水送的，係時令而且清潤的糖水，用料十足，腐竹也煲到90%溶，没有我不喜愛吃的白果，我一定會再光顧！

2014年6月26日星期四

疍包飯: Coco Vs Pokka

太古城AEON入面有兩間餐廳有疍包飯食，我兩間都吃過了，兩個疍包飯都各有特色，我兩個都喜歡！

Coco壹番屋的吉烈豬扒咖哩疍包飯，賣相唔錯，豬扒外脆內面肉質鮮嫩，疍皮嫩滑，夠而且提供足夠咖哩汁撈飯，價廉物美，如果真係要挑剔，只可以話佢疍皮唔係完完全全包裹著整個白飯。店內環境簡約為主，雖然不算High Class，但我覺得很舒服。

我既第一碟疍包飯係係POKKA CAFE食的，佢ge咖哩牛肉疍包飯係我既最愛，牛肉夠軟而且夠入味，疍皮完完全全包裹著整個白飯，因此不及Coco壹番屋的疍滑，如有需要可間侍應加一點咖哩汁，份量略為少一點，適合女仕食用，男仕們吃這個可能未必夠飽。店內環境優雅，配有水晶吊燈及Vintage梳化，High Tea首選。