懷孕心路歷程：01. Bingo篇

睇神醫睇左兩個cycle, 第一個cycle紅d冇變深粗，我都plan左要睇返一年半載，好好調理一番才會見效。進入第二個cycle, 紅d有變深粗，我地有跟神醫指示按時做功課，佢話如果M小姐11月24日都未黎，就可以驗孕。

24/11/2014

M小姐仲未黎，可以驗孕了，我都係cheap cheap地用綠d驗，隱隱約約咁見到條好淺色既線，但係都唔敢開心得太早，因為我好怕係化學懷孕。

26/11/2014

M小姐仲未到，係時候驗多次孕了，用左3支驗孕棒，3支都係positive

綠d條線比之前深左少少，但係都唔算好深色

中間果支係萬寧牌，都算深色了

Clearblue呢支棒，成舊水貴就貴左d，但係好清楚顯示係Pregnant 2-3

Clearblue所顯示既係Pregnant since conception，即係由受精日開始計，但係醫生計就係由last period開始計，因為佢地覺得一個period既開始，已經係準備好懷孕了，而預產期，一般來說就係last period Day 1再加280日了。

真係有點唔敢相信，因為我今個Cycle冇睇過西醫，只係睇左中醫，當然有乖乖的飲中藥。但係呢個中醫話唔洗戒口，所以我又食雪糕，飲汽水，仲要食左幾隻大閘蟹，食果陣仲要冇撩返果粒好寒涼既星星出黎。

27/11/2014

一日未睇醫生，我都未敢confirm呢個好消息，所以去左睇醫生驗孕，係驗尿既，結果係positive，醫生幫我寫轉介信，問我想睇邊度，我都係想揾間近自己既醫院，所以叫佢refer我去東區醫院。

之後我打比老公同妹妹報喜，佢地問我點解唔轉介去瑪麗醫院，我既理由係，大住個肚，都係找間近自己既醫院好d，呢排仲要玩緊佔中，西港島線又未通車，去瑪麗醫院的確有d遠。

第十二章: 到我睇神醫了

等左兩個月，終於可以見呢位中醫，我梗係要老公陪我一齊去睇啦。

由於我係新症，姑娘只可安排我平日既下午三點，為左生BB，我地兩公婆唯有一齊請假去睇醫生啦。那天我地食左午飯，兩點幾便到達中醫診所了，一入到診所，見到好多成功個案既BB相，放置於護士站既壁報板，希望我將來都可以成為佢其中一個成功個案la。

當時診所並唔多人，我地上前去護士站登記，點知個護士話我地個booking係三點未夠鐘，叫我地唔好係度等，我地唯有落街行下。反正到都黎左，咪忍下lor，可能個醫生真係好勁。

終於等到三點鐘了，我地返返去中醫診所，果度多左好多人，好彩仲有位比我坐姐。係度等既病人，有好多係一男一女咁一齊黎睇，亦有少部份係個女既一個人黎睇。

等左一個多小時，護士終於叫我名了，我同老公一齊入診症室見醫生。呢個中醫問左我好多以往既病歷，如之前睇過咩醫生（包括中醫及西醫），做過咩Treatment及家族遺傳等，醫生為每個病人開排板，並把資料記錄在排板上。

佢替我把脤，另外圖文並謬咁為我講解由M Come卵子受精到懷孕的過程，分析我的體質，話我有卵巢多囊，而我之打排卵針幫我谷好多卵，但係卵子質素差，多多都冇用，佢話而家會幫我養靚卵子，另外有教我地用紅d check排卵，根佢既指示，紅d到左深粗果日唔洗做功課，翌日要做功話，然後休息一天，翌日補做多一次功課便可。

最後，建議老公再驗多次精，下次覆診時會同我地講解報告。咁岩我今日睇醫生係Day 2，醫生今次會開一個星期藥給我，有助養靚卵子的。約我地一星期後再見。

不知不覺見醫見左成半個鐘，護士先為我約期及繳診金藥費，一星期藥加診金合共$830　（我覺得好抵呀），再等左幾個字，叫我名攞藥，醫生開既係中藥粉黎，護士教左我點服用後，我地就離開診所了。

第十一章：懷著半放棄心情，繼續生B計劃

一次家庭聚會中，經親友介紹轉睇另一個中醫，佢話佢都係睇呢個中醫得左，佢話都有介紹呢個中醫比佢同事，佢同事睇左幾個月就有左。嘩，咁犀利？! 我睇左幾年醫生都係食白果，我親友話中西合璧既效果係好唔同，叫我唔好灰心。

唉，即係又要睇中醫，又要打針？其實我唔抗拒睇中醫，但係對睇西醫真係有d反感。為左生BB，我打左好多次電話到中醫醫務所，但係未能成功接通，留左幾次言，可惜冇人回覆，我妹妹也有關心新中醫既事，佢仲話，可能呢個中醫真係好勁，叫我比d耐性打電話。我打左兩個星期電話，終於有護士接聽了，佢話新症要等2個月，約2014年9月中可以見醫生。

自從暫停打針療程後，我覺得心情輕鬆左好多，適逢轉工的關係，我真係抽唔到時間去瑪麗醫院了。就係咁，我懷住半放棄既心情，去實行生B計劃。

第十章：我係唔係應該放棄?

自第四次促排卵療程失敗後 ，由於又係打針刺激影響，有大量水泡未散，所以要停一個Cycle，等水泡散左之後才可開始第五次療程。

2014年9月3日 (Day 2)
大清早我自己一個返瑪麗醫院，準備開始第五次促排卵療程，教授幫我陰超完，見所有水泡已散，建議開始第五次Treatment。

每一次新既療程開始，都要驗血及到繳費處交HK$15000按金，今次也不例外，交過按金後再等姑娘給我針藥便可以離開。姑娘告知我今次打針，每天打75iu，我平時係打100iu的，唯一一次打75iu就是第三次促排卵療程，但係75iu對我根本起唔到作用, 那次打了7天75iu，結果又要補打多幾天100iu才見效，而家針藥用多了，醫生見多了，療程費用變得貴左幾千蚊。

我心諗，上次打75iu根本係冇用，所以我同醫生講，問佢可唔可以改返打100iu，但係醫生唔肯，話一定要我打75iu，我真係好唔開心，果日老公冇陪我去睇醫生，我唯有打左比老公，話佢知醫生要我打75iu，我唔想打，我今次真係崩潰了，講講下仲失控喊左出黎，姑娘接過電話同老公傾，結果醫生話如果我今次未ready，可以暫停療程，等我覺得ok先再返黎睇，仲suggest我去睇行為健康中心，佢話好多太太做treatment都會受情緒困擾，話睇左做好d。

唉，明明係個treatment對我起唔到作用，醫生又唔肯轉IUI / IVF，反而覺得我情緒有問題要我睇另一d醫生，真係好心酸，好無奈。

第九章：第四次促排卵療程

2014年7月

Day 2 (4/7)
教授見上兩次打75iu效果唔好，所以今次改藥量，叫我連打4天100iu後，再返醫院陰照。

Day 5-8 (5-8/7)
在家連續打了4天100iu，等待Day 9返去照陰超。

Day 9 (9/7)
返瑪麗陰照，教授見打了4天100iu，卵泡開始多，所以減藥至75iu，約我明天返黎陰超。

Day 10 (10/7)
今天回瑪麗陰超，教授決定打75iu，並約我明天再陰超，今次真係返黎返得好密，我擔心唔知幾時先可以打破卵針，我問問教授如何時可以打破卵針，佢話好大機會係聽日打。

Day 11 (11/7)
今早返瑪麗教授幫我照陰超，卵泡有長多及長大，有一顆特別大，約23mm，教授說今次效果理想，建議今日打破卵針，並提我今晚同聽晚要做功課，；由於我話佢塞陰道藥唔舒服，今次佢開返安胎針，叫我Day 16及Day 21返黎打針。

Day 16 & 22 (16/7 & 22/7)
早上返瑪麗打安胎針，16號當天，老公陪我返完瑪麗打針，之後一齊去書展。

Day 29 (29/7)
M小姐來找我了


療程感受分享：
由於打排卵針要配合定期早上返瑪麗醫院照陰超，為了配合返工唔遲到唔請假，我要5:30am起床，7:00am到達醫院，因為輪後排隊是以先到先得型式，而家求診者的數量倍增，我7:00am到達可以排頭5位，睇完醫生都夠時間趕返工。這麼早天未亮要我起床，而且還要幾天早起，真係令我身心疲累。

醫生話我要做促排卵6次後才可以轉Treatment，我真係覺得好side時問同金錢，但係唯有忍下，希望快快脆脆做埋第6次treatment後等轉IUI．

第八章：第三次促排卵療程

由於速排卵療程令我身心疲累，而且又貴，一次療程約$15000，所以我自從2013年10月之後，轉左睇中醫，睇左兩個Cycle唔得，經朋友介紹下轉睇氣功穴功中醫，睇左兩個Cycle都係唔得。適逢睇左無綫播放的守護生命的故事，其中有集詳細介紹不育，老公話呢個節目出左街，一定會好多人跑去求診，叫我快d睇返瑪麗，佢話覺得西醫科學d，所以我2014年5月重返瑪麗醫院，今次見主診醫生李醫生，佢一睇我個排版就問我點解咁耐冇返黎打針，本來想叫醫生轉Treatment，睇下可唔可以做人工授孕IUI，但比佢一口拒絕左，佢話IUI唔岩我做，叫我做返促排卵。我唔夠醫生講，唯有乖乖聽話打針。


2014年5月

Day 3 (26/5)
教授見上兩次打100iu，卵泡會過份刺繳，所以今次減藥，叫我連打5天75iu後，再返醫院陰照。今次老公陪我一齊去，問教授幾時先可以轉treatment，教授話正常夫婦都唔係行房一兩次就會成功懷孕，所以要試多幾次，佢咁講有說服力好多，咁唯有試多幾次。

Day 4-8 (27-31/5)
在家連續打了5天75iu，期待快d可以打破卵針。

Day 9 (1/6)
岩岩撞正端年節假期，所以星期日醫院都有開門，真係好感謝QMH的醫護團隊。今早楊醫生幫我照陰超，平時我睇李醫生/教授果陣，都有見到佢係度學野，我諗佢應該係實習醫生。今次卵泡長大未如理想，她叫我再打多兩天75iu，然後再返去陰超。

Day 11 (3/6)
今早返QMH楊醫生幫我照陰超，但卵泡仍然很細，似乎75iu對我起唔到作用，所以醫生將藥的劑量加至100iu，叫我連打3天後再返去陰照，我個心真係沈左一沈，而且好擔心3天後卵泡會不會長大。

Day 14 (6/6)
今日好彩係教授幫我照陰超，卵泡有長多及長大，有9-11mm，我還要多打兩天100iu，然後再返QMH照陰超。

Day 16 (8/6)
今日楊醫生幫我照陰超，卵泡有10-16mm，佢叫因為卵泡開始多，所以要減藥，要打多打兩天75iu，然後再返QMH照陰超。

Day 17 (9/6)
今早起床去第一次尿尿時，發現有好長既拉絲，返到公司去第二次尿尿時仍然有長拉絲，不知道是不是快要排卵？

Day 18 (10/6)
今早返QMH醫生幫我照陰超，卵泡有長多及長大，有兩顆特別大，分別為21mm及23mm，醫生提醒我如果繼續療程，有機會會有多胞胎，但我唔想浪費時間，同埋之前有一次treatment都係話有多過一個大卵泡，又係話有機會有多胞胎，點知又係食白果，所以叫醫生比我試下。醫生建議今日打破卵針，並提我今晚同聽晚要做功課，佢開左塞陰道藥比我，叫我Day 23-36要早晚塞藥，Day 40返去驗孕。

Day 19 (11/6)
唔知係唔係因為排卵既關係，個肚痛到好犀利，結果都係請左病假，係屋企抖返一日。

Day 20 (12/6)
今日返工，肚仍然係痛，好彩工作不是太忙，準時收工。但一上到巴士，我就開始中眼訓，真係唔明白點解之前Sick Leave係屋企抖左一日都仲係咁攰。胃口都係麻麻地，食少少野個胃又頂住，唔食又怕胃痛，食完飯返到屋企又係肚瀉。我真係唔想痛住個肚訓得唔好，所以晚上用左暖貼。

Day 21 (13/6)
唉！已經胃痛左成兩個禮拜，究竟係因為我打針削胃，定係腸胃炎？

Day 24 (16/6)
自塞藥後，我發現身體有一些變化：
1) 全身發熱
2) 周身痕癢
3) 乳頭敏感及脹大

Day 29 (21/6)
距離Due Day的日子續漸迫近，我的心情也隨之緊張起來，聽人話一對平常健康夫婦，有正常性生活的，懷孕的機會率只有20%。咁而家我又有多囊，又係30+；加以之前兩次OI都失敗左，我真係唔敢諗我有幾大機會可以Bingo。醫生開左14日塞陰道藥比我，我都好擔心我未塞夠14日就M Come (第二次OI Treatment，我塞左12日藥就M Come了)。

Day 32 (24/6)
由Day 23開始，已習慣每天早上6點塞藥，真係令人精神緊張，今日有強烈黎M前ge感覺，如胸痛、子宮痛、好多又熱又稀好似水咁ge分秘等，食完晚飯後去尿尿，發現有淺粉紅色分秘，雖然份唔多，但係我知道今次Treatment失敗了。

Day 33 / Day 1 (25/6)
今天早上粉紅分秘的量依然很少，我打返QMH問姑娘是否明天要去照陰超，她說要量多一點才可以。食過晚飯後去尿尿，發現量多了很多，確定M小姐來找我了，咁今日由Day 33變成Day 1了。

排卵針： Day 4 - 17 ，共14天 (75iu x 7 + 100iu x 5 + 75iu x 2 = 1,175iu)
破卵針：Day 18
塞藥：Day 23 - 32

療程感受分享：
由於打排卵針要配合定期早上返瑪麗醫院照陰超，為了配合返工唔遲到唔請假，我要5:30am起床，7:00am到達醫院，因為輪後排隊是以先到先得型式，而家求診者的數量倍增，我7:00am到達可以排頭5位，睇完醫生都夠時間趕返工。這麼早天未亮要我起床，而且還要幾天早起，真係令我身心疲累。

老實說，我對這次療程改了劑量，連打了7天75iu，可惜完全起唔到作用，害我額外再捱打多7天針，花了額外心神，亦花了額外金錢，再一次失敗，我真係覺得好失望。

第七章：氣功穴位治療

經歷過兩次促排卵療程失敗，以及兩次中醫藥療失敗後，本來想比自己休息一下，今個月想唔做Treatment，但經朋友介紹下，認識了一個專用氣功穴位的中醫，咁我個friend又腳痛定期要睇中醫，我見有人陪咪試下呢個氣功中醫lor。

呢個醫師，主要係用氣功按穴位治療的。按穴位之餘，仲要比佢打，第一次睇佢，佢建議第一個星期連續睇三天，因為之前未睇過的，經脈盡塞，不未一次把其打通，如果過幾天才回來，經脈又會塞返，咁好難會通到。而開頭比佢打真係好痛，因為d經脈塞晒，比佢打時叫到哇哇聲，打完三天後發現d穴位仲變埋瘀黑色，醫師話咁係平常，因為之前塞左ge穴道通返。

之後我每星期見醫師兩至三次，可能經脈已打通，再比佢打既時間，都唔覺得好痛，反而家得好爽，打完仲會精神爽利，比起睇QMH的打針療程，這個真係輕鬆好多。

醫師每次都會幫我把脈，亦會知道我大約幾時會排卵，提我邊日要做功課。咁我自己都會check住紅d同埋CB，同醫師suggest的時間差唔多。

為了達到最佳的效果，我捉埋老公一齊去睇，本著有病治病，無病強身的心態，睇左2個Cycle卜配合被打及飲中藥粉的療程，還有聽話的戒口，不準食凍野及甜野，體質係好左，個人變得精神爽利，又少左周身骨痛，但係生B計劃方面都係未能成功。

適逢睇左無綫播放的守護生命的故事，其中有集詳細介紹不育，老公話呢個節目出左街，一定會好多人跑去求診，叫我快d睇返瑪麗，佢話覺得西醫科學d，其實我真係好怕睇瑪麗，又貴又要早起身，去到果度又好重負能量，但係電視講到好似好得咁，加上睇左兩個中醫都唔成功，唯有打返瑪麗約期，順便同醫生傾下可否轉Treatment。