比人偷拍左都唔知

大老爺話要買多一部Notebook比佢，等佢可以係假日寫下Blog咁。

新呢部有touch screen功能，方便好多，唔洗成日攞住隻mouse咁唔方便，坐係梳化用就最岩了。

佢未用之前，等我幫佢試下機先，近來迷上左玩Criminal Case，玩Game玩到入晒神，比佢影左相都唔知tim。

【奈奈子廚房】蒜蜜燒雞翼

呢味又係李錦記Crossover德國寶既簡易小菜

材料:

雞翼8隻

李錦記蒜蜜雞翼醬1包

步驟：
1. 首先把雞翼解凍，以水沖洗，然後瀝乾水份
2. 將雞翼放在大碗/碟中，加入蒜蜜雞翼醬及燒酒，與雞翼混合，醃大約1小時
3. 以光波爐用180度煮5分鐘，高架擺放
4. 再轉雞翼反轉再以光波爐用150度煮3分鐘
5. 把雞翼上碟，大功告成

穿波衫的我

大老爺喜歡著波衫，叫我買件波衫同佢情侶裝，大佬呀，我已經係短頭髮，仲要我著波衫攪到我成個男人咁，我梗係唔制啦。

大老爺話自己肥左，有件波衫唔岩著，係我極不情願抵下，佢叫我著佢呢件：

本來我都黑口黑面咁，佢又話要幫我影相，咁唯有笑住影啦，但係我係唔會著出街架。

Space Invaders Graffiti‬

原來樓梯街都有Space Invaders既馬賽克塗鴉！作品位置就係樓梯街個路牌上方。難得仍然保留著，未有被消失。

其實這區一向都有人用噴漆塗鴉，没有藝術天份的我，雖然不太懂得欣賞，但係的確為平淡及殘舊的牆身增加不少色彩，如果這幅牆身上没有任何塗鴉，只會給人又舊又髒的感覺罷了。

牛記小炒

牛記小炒：這度菜顏色鮮艷，配有蝦乾、魷魚、腰果、豆角及三色椒等，味帶少辣且有鑊氣，最岩餸飯及餸酒！

鼓汁蒸魚雲：繼上次薑葱魚雲煲後再試下蒸魚雲，蒸魚雲不及薑葱魚雲煲般香口，但係由於食左一個小炒，真係唔敢再吃其他熱氣野。

綠豆沙：呢排個人燥底，今日呢個糖水岩晒我。

紅肚倉魚

某日我同大老爺行街市，見到魚檔有呢條寫住係咸水魚既魚，我地見佢大條又厚肉，所以買返黎試下。

魚檔話呢條係叫唔知咩倉，我叫佢紅肚倉魚罷。

睇下佢幾大條，30蚊真係好低。

大老爺又惡攪放d豆腐係魚底度蒸，今次仲落左大量既葱。

後記：呢魚種味道鮮美，肉質嫩滑肥美，又平又抵食，但係佢有好多Y型的細骨，不太適合兒童食用。大老爺連續兩天都買了呢種魚，由於多細骨，所以他吃了魚的70%，可能呢種魚比較肥膩，大老爺都食到怕怕，佢無端端話想食牛，哈哈！

Mickey Mouse Pencil Case

呢款矽膠Mickey Mouse筆袋好靚呀，仲有紅、黑、紫、黃等顏色。

可惜我唔再係學生用唔著，不過買黎當擺設都幾靚喎。

中秋果籃驚喜

今日好開心收到Spring Collection送黎既hamper，入面的水果大部份都係來自日本的，還有月餅、朱古力、曲奇、果醬﹕、紅酒及茶葉等，真係超級開心呀!

未影相就急不及待咁拆開左了，呢幾樣係我既favourite，特別係Godiva，睇黎我既減肥計劃又要無限期postpone了。

Jamie's Italian晚飯要等3個鐘

  某天晚上約左朋友去銅記食飯，我提議去Jamie Oliver開果間餐廳食，由於佢online booking已滿，唯有放工即閃去等位。

六點幾去到登龍街既Jamie's Italian門口，已經有好多捧場客係度排隊，我排左半個鐘頭，終於去到登記處，但係個waitress話要等到9:30pm先有位，佢幫我登記左，話我可以9點鐘先返黎，我地真係等唔到咁耐，唯有轉地方。

花左我半個鐘排隊，雖然今次食唔到Jamie，我都要影返幾張相先得。

這個放滿merchandise的櫃好有特色呀

多款Jamie品牌Wine Vinegar以供選購

Jamie's Italian Napkin

Jamie's Tea Towel

Jamie Oliver食譜

Jamie杯子

以為自己好早黎排一定有得食，真係估唔到要等幾個鐘，嗚嗚...

Lipton試飲又送杯 @ Food Expo 2014

黎到美食節，見到Lipton都有擺檔，佢地唔係賣野，而係為我地獻上冰凍既奶茶，同埋大派。

係佢地個Booth度影張相，upload上facebook，仲會送多隻Lipton奶茶杯比你tim。

我本來想叫大老爺去影相幫我攞多個杯，大老爺怕羞唔肯影。

杯內有紅字標示建議沖調水量

紅米手機

某天晚上，大老爺說有東西給我，他打開包包遞給我這個，並叫我自己拆開。

原來是紅米手機，雖然不是最新型號，但是看起來也很吸引。

這部紅米比Note3細一點，但是很岩我手型，哈哈！

Food Expo 2014 - 食野篇

場內一直見到有人食一些像油炸鬼夾雪糕的食品，找了很久終於見到賣呢種韓國雪糕的booth了，勁多人排隊。

唔好講笑啦，排到前面有職員舉著Ice-cream Sold Out的牌，我見前面的人龍未散，我唔理指示繼續排隊。

終於比我買到了，粟米筒入面唧滿雲呢拿軟雪糕，我覺得没有很大的驚喜，但係好多大人細路都係度食呢隻雪糕，我冇理由唔試架麻，$20 一條，都唔平架。

除左油炸鬼夾雪糕，Booth內還有魚型燒餅賣

見好多人買，羊群心態，我地又買左一包。

程班長：虎咬豬 (刈包) - 會場價$32

呢個包入面好多肥豬肉同菜架，一個人食可能會太肥膩。

程班長：台灣紅燒牛肉面 - 會場價$38

食完野好口渴，飲返個椰青，清甜又解渴。

袋裝滿漢大餐

平時食開碗裝的滿漢大餐，今次試下佢既袋裝先。

根據指示，佢話可以將個面拆左出黎，放係隻碗度以食碗面既方法烹調，不過我慣左袋裝面係要煮的，所以都係開左爐煮左。

同碗裝既冇分別，一樣咁好食，佢呢個包裝係方便物流同埋比較環保的，可惜佢價錢同碗裝冇咩分別，所以好難令人有incentive去買，因為食完呢個要洗碗。

川芎白芷天麻魚頭湯

上次為左慳錢掟左個石斑頭落去煲天麻，雖然個湯味道唔錯，但係石斑頭冇魚雲，味道不及大魚頭肥美，今次同大老爺行街，比我地見到有個魚檔放左成十幾廿個大魚頭係度，而且D魚頭仲係郁郁下，極之新鮮。結果我地兩個魚癡係低受不住引誘既情況底下，買左個大魚頭再煲天麻魚頭湯。

呢碟係我擺既，擺得唔夠大老爺靚

我特登將D材料放近我身邊，咁大家可以可知魚頭的size

呢張相係大老爺影既，佢把個魚咀張開口來影相，個效果好得意

食譜：

川芎白芷天麻魚頭湯 (4碗)

川芎  少許

白芷  少許

天麻  少許

大魚頭 1個

粟米  2件

紅蘿蔔 2件

金華火腿絲  2湯匙

米酒   4湯匙

1) 藥材浸30分鐘，清洗乾淨

2) 把魚頭煎香

3) 把所有材料加入４碗水，於入煲內，大火煲30分鐘

4) 熄火後，放入真空煲2小時

5) 飲用前，大火再煲30分鐘即可

今次冇落花膠同螺片，我用水左水去煲，由6碗水減至4碗水

個魚檔放左成十幾廿個大魚頭係度，而且D魚頭仲係郁郁下，極之新鮮 

買左個50蚊既大魚頭，魚販幫我劏開左個魚頭，見到舊魚雲又大又肥美。 

今次由大老爺親自醃制大魚頭

把大魚頭放入煎pan中煎香

 反轉再煎

川芎白芷天麻等藥材要用水浸乾淨

 

把已浸乾淨的藥材及煎香的魚頭放入煲入內

 加入4碗水以大火煲30分鐘，熄火後再放入真空煲煲2小時，飲之前以大火煲30分鐘即可

完成了，川芎白芷天麻魚頭湯，藥材味極重，但療效顯注，係頭痛一族既恩物。