木瓜芒果奶, 飲完再encore

15/10/2016

阿女自從轉3號奶粉後，唔知係唔係腸胃唔好，便便一直唔係咁好，轉左幾個牌子既配方奶粉都未有好轉，聽左個由營養師主持的講座，話一歲BB可以用牛奶代替奶粉，牛奶比奶粉平，而冄冇咁熱氣，營養價值亦很豐富，所以買左d紙包奶比阿女試飲，阿女係奶王，奶粉同紙包奶都一樣咁鐘意。

木瓜芒果奶, 飲完再encore

第一次飲木瓜芒果奶

做乜捐枱底呀?

做乜咁望住媽咪呀，係唔係想上黎陪媽咪訓？

鐘意上大人床訓，訓埋爹哋個位

BB體重急劇下降, 需立即入院

18/08/2015

由於BB出院時仲係有d黃，醫生話BB要返東區醫院黃疸clinic覆診。今日我冇叫陪月陪我返醫院,，因為怕佢9:00am趕唔切，所以叫左工人陪我。

到左黃疸clinic，姑娘先幫BB磅重，佢話阿女體重輕左13%，阿女疴橙尿，有可能會影響腎功能，醫生話要安排BB即時入院。

聽到呢度我我心好痛，我帶左佢返屋企兩日，呢兩日我都係埋身餵，阿女好努力啜，啜到我乳頭都損晒，但係食唔飽，好彩咁快要帶佢返醫院覆診，如果唔係餓死左佢我都唔知咩事。

姑娘立刻為阿女準備左3oz配方奶，唔夠1分鐘佢就飲晒支奶，見到呢個場面我真係忍唔住喊左出黎。

醫生好快安排左阿女去兒科病房，醫院叫我預備BB的入院用品，並按指定的餵奶時間返醫院探阿女。

阿女住院期間，我試過埋身餵，亦試過用醫院的pump奶機（由於被阿女啜損乳頭，考慮緊買唔買）。

阿女已經出世第8天，我應該上奶了，但兩邊乳房夾埋Pump左15分鐘只係得10ml奶，我初時以為比機壞左，原來係我唔夠奶，以我咁ge奶量，餵45分鐘都係得30ml，唔怪得阿女唔夠飽。

由於我唔夠奶，醫院提供了配方奶比阿女，而醫生建議每餐份量係90ml，而我亦要係醫護人員指導下學用奶樽餵奶。

19/08/2015

感謝醫護人員對阿女悉心照顧，留院一晚後，阿女體重由入院前2.73kg，回升至2.995kg，面色紅潤番，可以出院了。

醫生comment我breastfeeding係adequate technique但inadquate amount, 經多番考慮後，我決定轉餵奶粉。

懷孕心路歷程: 05. 我的小公主出世了

3/8/2015

預產期已到，但仍未有見紅穿水等徵兆。

5/8/2015

回東區醫院做產檢，醫生話我子宮頸未成熟，如果10/8/2015仍未有未有見紅穿水等徵兆，需要於當天早上8點返醫院進行催生。

10/8/2015

• 7:00am - 因為太緊張，我整晚失眠，我吃過早餐 (媽媽說生仔要用力，叫我吃飽才入院)
• 8:00am - 到達醫院，當天早上醫生評估我的子宮未夠成熟，安排我入住產前病房．
• 9:00am - 經陰道放入(催生藥)前列腺素栓劑 (PGE2) ，由於PGE2有時會過度刺激子宮，醫生會利用胎心聲監察儀密切監察宮縮及胎兒心跳。
• 3:00pm - 姑娘問產前病房之準媽媽有冇興趣聽講座，講座內容主要係關於餵母乳及幫BB沖涼，當時我隔離床的準媽媽正在陣痛，我對面床的準媽媽穿水要送入產房，我開始有點著急，為何塞藥仍未有任何反應?
• 11:00pm - 我覺得有急屎的感覺，但我又怕用力會影響，怕疴返粒催生藥出黎，所以我去護士站問可否去疴屎，她們說冇問題不會影響的。
• 11:30pm - 產前病房的洗手沐浴室好大，今次我用力疴屎都疴唔出，但我唔想入到產房生緊BB才疴屎，係洗手間坐了花了30分鐘，終於疴得出，但唔係屎，而係一泡紅包杰撻撻既液體，我疴出返病床睡覺得個肚好痛，於是按鐘叫姑娘，姑娘話我係見紅，係好事。

11/8/2015

• 7:00am - 肚痛了成晚我又失眠了，醫生巡房了，她替我用手指檢查宮項，檢查時我穿水了，醫生話我開左兩度，姑娘叫我立即執整野，並且通知家人到產房，當時我又緊張，又期待，終於到我入產房了，但我又很擔心，因為我還未食早餐，怕冇力生BB。
• 8:00pm - 老公陪我進產房，當時我告訢醫生我未食早餐，她幫我吊催生藥及鹽，並且駁上胎心監察儀。
• 2:00pm - 醫生再幫我檢查宫頸，已經開到4度了，但睇返胎心監察儀報告，胎心有1分鐘口一中心跳得唔好，醫生話BB瞓個位瞓得唔好，塞住左出唔到，所以決定要開刀。醫生問了我一些病歷後，替我安排了去手術室開刀，當時係用半身麻醉的。
• 3:00pm - 好在有老公陪產，因為我真係害怕得要命，不知道為什麼醫生突然要猛力按我上腹，上腹並没有麻醉啊，不知道過了多少時間，他們抱著BB，把BB放左手術床上與我們合照。

11/8/2015 - 我地同BB既第一張合照

東區醫院幫老公同BB合照

原來剖腹生產也會用夾子幫助取出嬰兒

12/8/2015 - 終於可以落地同BB合照了

做人最緊要有中指

16/8/2015 - 換返自己d衫衫，出院了．醫生話BB有d黃，過兩天要返黃疸clinic覆診

懷孕心路歷程: 04. 照結構，好緊張呀

21/3/2015
成個月冇見過小寶貝了，終於20週了，今次去私家醫生照結構，既緊張，又興奮。

醫生問我點解唔照左政府先，我笑笑口話:「我信你多d麻!」

懷孕期間，我身體變弱了，唔係感冒，就氣管敏感，今次仲腸胃炎tim。

今次照BB, 見到佢長大左好多，而且活躍左好多，成日郁手郁腳咁，唔怪得動胎感動強左咁多。

醫生檢查左BB心臟、四肢、嘴巴、脊椎等，大致上冇問題，2月照超聲波果陣，由於BB夾埋左隻腳，所以睇唔到佢係仔定係女。今次佢終於大方咁比我地睇，係BB女黎。

醫生開左止疴止嘔藥我，而護士送我兩罐1號仔奶粉，還有一份我睇唔明既report及BB 3D相一張。

BB好中意把雙手放係面前，呢張相佢張開左個口。

25/3/2015
今日照結構係政府醫院安排的，本來見私家醫生照左冇事，就唔想返東區醫院照，但係都係照多次穩陣d。

等左大約一個鐘，終於到我照了，今次安排左一位男醫生幫我照超聲波的。想不到政府照結構比私家還要仔細，醫生檢查左BB心臟、腦袋、臉頰、腎臟、四肢、血管、脊椎、還量度了BB頭部及肚的大小，政府醫生告訴我BB係女仔，同私家醫生一致。最後，醫生給我到診紙、懷孕證明，預產期為08/03/2015。

老公替超聲波相畫上輔助線，咁樣清楚好多

助孕湯水: 水魚湯

自懷孕以來，我不斷回想自己之前做了什麼和吃了什麼，以下呢個湯水係我係懷孕前常飲用的，聽說水魚湯含豐富骨膠原，滋陰助孕。當初就是參考網上一個食譜：

水魚湯

作用：女性到了排卵期前後白帶越來越透明, 像清鼻涕一樣，可以拉絲，這樣的白帶利於受孕，但是有些女性透明白帶少，或者很混濁，是不利於懷孕的，現在介紹一個比較實用簡單的食療方法，對增加透明拉絲白帶有好處。

每次月經5天後，開始水魚湯食療，便宜又有效。朋友們不妨試試，而且這個食法，對一些卵泡發育不好的朋友也會有很大幫助，無任何毒副作用。

材料：

野生水魚１隻（約1斤重）

杞子10克

山芋肉（又叫：山茱萸）10克

淮山（又叫：山藥）10克

做法： 水魚表皮的那層膜要先用漲水燙掉，宰成小塊，煮的時候放點薑和蔥，煮到40分鐘的時候放點放鹽、味精及薑葱。燉大概45分鐘。

對了還有，中藥和水魚要一起下鍋，味道有點酸酸的，我覺得不難吃，我是連湯帶肉全吃光的。

水魚含豐富骨膠原，別忘記吃湯渣呀

食譜參考：
http://www.babysailing.com/Pre-pregnancy/1/2013-12-09/37065.html

懷孕心路歷程：03. 超聲波相解說

15/1/2015

政府醫院有為部份孕婦安排見助產士輔導，預防產前或產後抑鬱的風險。
我也被選中見助產士，同老公一齊見，佢地都係了解下我地兩個及家庭背景咁，並且定時會約見我作跟進。

17/1/2015
由於政府醫院資源不足，醫生有建議我可以開始找私家醫生做產檢。老公比我緊張，佢幫我係銅記預約左個私家醫生照超聲波，私家醫生的儀器比政府的先進，唔怪得咁多人都找私家照3D / 4D啦。 第一次照到BB, 有頭有四肢，不過現時BB唔係咁活躍，要醫生郁下我肚皮佢先會郁，第一次聽到BB心跳同埋見到佢郁，我覺得好amazing。BB由一泡營養液，到有心跳，然後再長出四肢，一個小生命就係咁孕育出來，十分奇妙呀。

20/1/2015
東區醫院做唐氏測試
包括度頸皮及驗血兩個測試，等左兩個鐘，終於到我照超聲波了，度左頸皮正常，之後去左抽血，吉左幾針先抽得出血，政府醫院話如果驗到有問題有另外通知我。

11/2/2015
第二次到東區見助產士，老公有陪我一齊去，都係了解返我地既近況，並且比左一些有用既資料我地，如：母乳餵哺的小冊子，以及其他聯絡資訊等。

見醫生，講解返上次唐氏測試的結果，一切正常。另外，聽左BB心跳，檢查陰道，痛都痴筋，好彩老公陪住我。

14/2/2015
第二次到私家醫生照BB, 同埋媽咪奶奶一齊去，BB夾埋隻腳，睇唔到係仔定女。

由於超聲波相比較抽象，老公為我勾劃左d輔助線出黎做解說

懷孕心路歷程：02. 幻得幻失篇

4/12/2014

自從驗到有BB之後，我肚不停咁痛，今日連續痛左半個鐘以上，我同老公都有點擔心，所以去左急症室。急症室醫生話要幫我照超聲波，叫我飲好多水，覺得好急尿咁再返黎照，我飲4杯水，覺得急尿咪返去等醫生，點知醫生話我飲水唔夠多，叫我再飲多半支水先返黎照。

再飲多大半支水，真係急到想賴尿，好彩醫生及時叫我入去，我再次爬上床照起聲波，但係今次都係照唔到心跳，只照到子宮度有泡野，醫生向我索取尿液樣本驗孕，當時我心沉左一沉，唔通醫生都覺得我唔係真係有左BB?

驗尿結果顯示我係懷孕，我當日已經係6 weeks了，點解仲未照到心跳呢？醫生話有以下可能性:

1) 有左但係小產左

2) Period咁唔準，BB細左未足6 week

醫生建議我可以留院觀察，或者寫紙比我睇專科，我同老公都好擔心，留院應該可以快d check到咩事，反正我睇專科同留院都係要請假，我決定留院。

護士帶我上病房，安排了醫生幫我照陰超，我又急尿了，要清左小便才可以照陰超，醫生話子宮果泡野係營養液，未有照到心跳。

照完陰超便返病床，我打電話比老公，叫佢幫我返屋企攞眼鏡，衣物及日用品等，辛苦佢了。

返左病床冇幾耐，又有護士叫我留小便樣本，咁我又要飲水了，果時已經12點了，好想快d疴完尿就訓覺。點知收左尿液樣本後，護士話太少，要再疴過，救命呀，我飲水飲到肚脹了！

5/12/2014

係醫院訓左一晚，早上醫生巡房，話我有咩大礙，可以call家人接我出院，並且約我兩星期後返黎照超聲波。

19/12/2014

今次去東區醫院照超聲波，終於照到BB心跳了，可惜醫生唔比老公陪我入去一齊睇。

醫生話我BB細左，而家先係7 weeks, 所以要改1月15日照唐氏。

20/12/2014

今日睇神醫，話左比佢知照到BB心跳，神醫就同我講佢任務完成，叫我生左B先返黎揾佢。

懷孕心路歷程：01. Bingo篇

睇神醫睇左兩個cycle, 第一個cycle紅d冇變深粗，我都plan左要睇返一年半載，好好調理一番才會見效。進入第二個cycle, 紅d有變深粗，我地有跟神醫指示按時做功課，佢話如果M小姐11月24日都未黎，就可以驗孕。

24/11/2014

M小姐仲未黎，可以驗孕了，我都係cheap cheap地用綠d驗，隱隱約約咁見到條好淺色既線，但係都唔敢開心得太早，因為我好怕係化學懷孕。

26/11/2014

M小姐仲未到，係時候驗多次孕了，用左3支驗孕棒，3支都係positive

綠d條線比之前深左少少，但係都唔算好深色

中間果支係萬寧牌，都算深色了

Clearblue呢支棒，成舊水貴就貴左d，但係好清楚顯示係Pregnant 2-3

Clearblue所顯示既係Pregnant since conception，即係由受精日開始計，但係醫生計就係由last period開始計，因為佢地覺得一個period既開始，已經係準備好懷孕了，而預產期，一般來說就係last period Day 1再加280日了。

真係有點唔敢相信，因為我今個Cycle冇睇過西醫，只係睇左中醫，當然有乖乖的飲中藥。但係呢個中醫話唔洗戒口，所以我又食雪糕，飲汽水，仲要食左幾隻大閘蟹，食果陣仲要冇撩返果粒好寒涼既星星出黎。

27/11/2014

一日未睇醫生，我都未敢confirm呢個好消息，所以去左睇醫生驗孕，係驗尿既，結果係positive，醫生幫我寫轉介信，問我想睇邊度，我都係想揾間近自己既醫院，所以叫佢refer我去東區醫院。

之後我打比老公同妹妹報喜，佢地問我點解唔轉介去瑪麗醫院，我既理由係，大住個肚，都係找間近自己既醫院好d，呢排仲要玩緊佔中，西港島線又未通車，去瑪麗醫院的確有d遠。